التسوق في شرم الشيخ

التسوق في شرم الشيخ واحد من الأنشطة الرائجة جدًا في المدينة، وده لأنها بتتميز بتنوع المناطق التجارية اللي موجودة فيها ما بين المولات الراقية اللى بتتوافر فيها أشهر الماركات العالمية والمنتجات المتنوعة، وما بين الأسواق الشعبية البسيطة اللى بتزخر بتوافر المنتجات اليدوية الصنع الجميلة، وكل مكان فيهم هتحس بطابع مختلف عن التاني، في المولات مثلًا هتكون مُحاط بالمعالم السياحية الفريدة اللي ليها طابع غربي حيث النوافير والتماثيل والمنحوتات والأضواء المبهجة، أما المناطق التجارية الشعبية فبيغلب عليها الطابع البدوي التراثي حيث المتاجر البسيطة والفعاليات الفلكلورية اللي بتقام فيها زي التنورة والألعاب النارية اللي عادًة بتكون في الفترات المسائية لتوافد الزوار فيها للسهر والإستمتاع بيها، وأكتر المنتجات المشهورين بيها في مدينة شرم الشيخ هي المنسوجات البدوية زي السجاد والملابس، ولوحات البردي، والمصنوعات الفخارية والنحاسية والخشبية زي الأواني والصناديق المزينة.

من أشهر أماكن التسوق في مدينة شرم الشيخ

سوهو سكوير

يغلب عليه الطابع الإنجليزي نسبة للمعالم الأجنبية الموجودة فيه واللى أهمها النافورة الراقصة والمنحوتات والتماثيل اللي هتقدر تتصور جنبها أجمل صور تذكارية، والمطاعم المتوافرة فيه بكثرة واللى بتقدم المأكولات العالمية ما بين الأكلات الهندية والآسيوية والشرقية والغربية، وتقدر كمان تقعد على واحد من الكافيهات الموجودة فيه وتستمتع بمشروبك المفضل في الهواء الطلق، أو وانت بتزور المسرح المكشوف اللي بيتم فيه العروض الفنية للمطربين والفنانين اللى بيقوموا بالإستعراضات الفنية الجذابة، وكمان بيتوافر به صالة البولينج والبلياردو اللى تقدر تستمتع بوقت لطيف فيها مع صحابك أو عيلتك، وبعد كده تجرب التزحلق على الجليد واللي بيناسب الأعمار المختلفة من الشباب والأطفال، وفي نهاية اليوم تقدر تتفرج على فيلمك المفضل في دور السينما اللى بتعرض الافلام بتقنية الـ 9D.

خليج نعمة

يُعتبر من أشهر الأماكن في مدينة شرم الشيخ لموقعه المتميز المطل على مياه البحر الأحمر والأنشطة السياحية والترفيهية المتنوعة المتوافرة فيه بالإضافة إلى الفنادق الراقية المتواجدة فيه، بيضم خليج نعمة المتاجر اللي بتعرض الهدايا التذكارية المتنوعة ما بين لوحات البردي والإكسسوارات، والمطاعم اللي بتقدم الأطباق العالمية والمحلية بجانب الكافتريات اللي بتقدم المشروبات المتنوعة واللي بتتميز بطرازها الكلاسيكي والمكسيكي والخليجي وبتقام فيها الفعاليات الفلكلورية زي عروض التنورة، ده غير انك هتلاقي فيها الأنشطة المميزة اللي مش هتقدر تقوم بيها غير خلال تواجدك في خليج نعمة زي مساج الأسماك وهو من الأنشطة الجديدة اللى هتقدر تجربها من خلال وضع قدمك داخل حوض مليان بالأسماك، وللبنات هيقدروا يجربو رسم التاتو، ولمُحبي الفن فموجود مجموعة من الفنانين اللى هتقدر تحصل على بورتريه خاص بيك خلال وقت بسيط، ولو بتحب الأنشطة المائية هتقدر تتعرف على العروض السياحية اللى بتوفرها الشركات المنظمة ليها وده لأن مياه البحر الأحمر بتتميز بإمكانية الغوص والسباحة فيها للتعرف على الحياة البحرية المليانة بالشعب المرجانية والأسماك الملونة، أما عن الشوبينج فمن أشهر الأماكن الموجودة في خليج نعمة هو شارع “الشانزلزيه” أو المشاية واللي بيتوافر على الجانبين المتاجر وأماكن بيع الهدايا التذكارية.

لا سترادا مول

وهو من مولات التسوق اللي بيتوافر فيها مجموعة من المتاجر اللى بتعرض المنتجات المتنوعة من الملابس والأحذية والشنط والهدايا التذكارية، بالإضافة لتوافر المطاعم والكافتريات اللى بتقدم الأطباق والمشروبات المتنوعة، وبتقام فيها الأنشطة السياحية الجذابة زي الفنون الإستعراضية والرقصات الجميلة اللى بيتم عرضها في المسرح الخاص بيه.

الميركاتو مول

من أشهر مولات
التسوق الموجودة في مدينة شرم الشيخ، وموجود في هضبة “أم السيد”، بيضم
مجموعة كبيرة من المتاجر البالغ عددها 400 متجر لعرض المنتجات المتنوعة من الملابس
والشنط والأحذية، بالإضافة إلى خدمات الموبايل والإتصالات والبنوك، وبيتوافر فيها
المطاعم اللي بتقدم الأطباق العالمية، ومن الأنشطة المميزة اللي بتتوافر فيها
إقامة الحفلات والفعاليات اللي بتقام في المسرح الروماني والمسرح المكشوف
المتواجدين فيه، بالإضافة لتواجد مكان مُخصص للأطفال مليان بالألعاب الترفيهية
المناسبة لأعمارهم المختلفة.

جنينة مول

وهو واحد من مولات
التسوق الموجودة في منطقة خليج نعمة، بيتوافر فيه ما يزيد عن 300 متجر لعرض
المنتجات والهدايا التذكارية، بالإضافة للمطاعم اللي بتقدم المأكولات اللذيذة
المحلية والعالمية، ومن الأنشطة الترفيهية المتوافرة فيه صالة التزليج والبلياردو
والبولينج ومنطقة مُخصصة للأطفال، وكمان هتقدر تزور متحف الفراعنة المتواجد فيه،
ودور السينما اللي بتعرض الأفلام بتقنية الـ 7D والـ 4D.

السوق القديم

يُعتبر من المناطق التجارية والسياحية اللي زادت شهرها مؤخرًا بسبب إعادة تأسيس مسجد الصحابة اللي بيتميز بمعالمه الفريدة، أما منطقة السوق القديم فهي من الأماكن التجارية اللى بيتوافر فيها المحلات التجارية اللي بتعرض المنتجات الأساسية زي الخضراوات والفاكهة والملابس والأجهزة المنزلية والكهربائية، بالإضافة إلى الهدايا التذكارية والمنتجات اليدوية الصنع، وفي الفترات المسائية بتقام فيه الفعاليات الموسيقية والفنية زي عروض التنورة والألعاب النارية اللي هتقدر تستمتع بيها خلال تواجدك في واحد من المطاعم أو الكافتريات المتواجدة فيه وتناول المأكولات العربية اللذيذة، وبتتميز منطقة السوق القديم بأسعارها المعقولة عن باقي المناطق التجارية بالإضافة لفرصة التعامل مع سكان المدينة والتعرف على أسلوب معيشتهم والإحتكاك بيهم.

الأماكن التجارية في مدينة شرم الشيخ مش مقتصرة فقط على عملية الشراء والبيع، لكن بتعتبر من المعالم السياحية اللي بتجمع بين التجارة والسياحة من خلال العروض الفنية اللي بتقام فيها من عروض التنورة والألعاب النارية وعروض السحرة، بالإضافة للمعالم السياحية الفريدة المحيطة بيها سواء اللي بتتصف بالطابع الغربي أو الطابع العربي البدوي، ده غير انها بترضي مختلف الأذواق لعرضها المنتجات ذات الماركات العالمية والمنتجات يدوية الصنع.