خليج نعمة شرم الشيخ

خليج نعمة بشرم الشيخ من أشهر الأماكن خصوصًا لموقعها المميز واللي فيها نقطة تلاقي قارة أفريقيا وآسيا، وهي من المعالم الجاذبة للسياح لأنها من الأماكن المُتكاملة المرافق والخدمات السياحية من المولات والبازارات والمطاعم والكافتريات والنوادي الليلية والترفيهية، وكمان فيها مجموعة كبيرة من شركات تنظيم الرحلات السياحية لمحمية رأس محمد ورحلات السفاري اللي السياح بيزوروا مدينة شرم الشيخ مخصوص عشانها، وخليج نعمة من الأماكن اللي بتبدأ الحياة فيها بليل، ومن أبرز المعالم الموجودة فيها هو شارع “الشانزلزيه” وهو الممشى السياحي بالمدينة واللي فيه مجموعة كبيرة من البازارات والكافتريات والمطاعم اللي بتتنوع تصميمها وطرازها ما بين الكلاسيكي والعربي والأوروبي، ده غير انك هتستمتع بمجموعة من الأنشطة اللي مش هتقدر تلاقيها غير في خليج نعمة، زي مثلًا مساج السمك، وانك تترسم بورتريه، أو حتى ترسمي تاتو وحنة، وطبعًا لا غنى عن التسوق في مكان زي ده عشان تشتري الهدايا التذكارية الجميلة ليك ولقرايبك وصحابك وتبقى ذكرى معاك، ولو من كتر الكلام عن خليج نعمة حبيت تسكن قريب منها فالمدينة وفرت لك مجموعة من أرقى الفنادق فيها عشان تكون قريب منها وتستمتع بالأنشطة السياحية طول رحلتك.

رحلات سياحية إلى شرم الشيخ

الأنشطة السياحية في خليج نعمة

التسوق: وده لأن خليج نعمة هي أفضل منطقة تقدر تتسوق فيه لأن فيها مجموعة متنوعة من البازارات والمحلات التجارية والمولات اللي بتعرض الهدايا التذكارية والإكسسوارات، وكل ده موجود في شارع الشانزلزيه وهو الشارع الرئيسي بالمنطقة وعبارة عن ممشى طويل مُكون من مجموعة من الممرات، ومن أشهر المولات التجارية في منطقة خليج نعمة هو سنتر نعمة واللي بيضم مجموعة متنوعة من المحلات التجارية والمطاعم والكافتريات، بالإضافة انه متوفر فيه المتاجر اللي بتعرض المنتجات يدوية الصنع اللي بيشتهر بيها أهل سيناء زي الملابس والإكسسوارات، وعلى أول الشارع هتلاقي هايبر ماركت كارفور واللي فيه هتقدر تلاقي احتياجاتك بسهولة من لوازم البيت واحتياجاتك اليومية.

زيارة النوادي الليلية: عادًة بتبدأ من الساعة 10 بليل وبيتم فيها العروض الفنية من الرقصات على الأغاني المتنوعة طول الليل ولحد تاني يوم.

الأكل: وهتلاقيه متوافر بكثرة طول ما انت ماشي، لأن أصلًا الشارع عبارة عن ممرات بتضم المطاعم والكافتريات اللي بتقدم الأطباق العالمية والمحلية مع طراز عربي أو مكسيكي أو أوروبي، وكمان بتقدم لك مجموعة من العروض والأنشطة اللي هتسليك خلال القاعدة لأن المطاعم هناك مش مجرد مكان للأكل وبس، ده بيعاملوها معاملة المعلم السياحي.

مساج السمك: وهو من أغرب أنواع المساج اللي ممكن تجربها في حياتك، وده لأن السمك المرة دي هو اللي هيعملك مساج لإيديك ورجلك بمجرد ما تدخلها في حوض السمك وتسيبه يشوف شغله وبعدها هتستمتع بالتجربة وهتحتاج تجربها كزا مرة.

الرسم: وسواء الرسم الفني المعروف وهو اللوحات الفنية اللي هتترسملك وانت واقف، أو حتى رسم التاتو والحنة للبنات، فالإتنين متوافرين في امتداد شوارع خليج نعمة من خلال الفنانين الهواة الموجودين في المكان باستمرار.

حجز رحلات سياحية: ودي لو حبيت تروح رحلة بحرية أو رحلة سفاري فإنت هتلاقي الشركات المختصة في حجز الرحلات دي في منطقة خليج نعمة، ولكن بينصح دايمًا بالتعامل مع جهات موثوق فيها، والرحلات دي عادًة يا بتكون رحلات سفاري في الصحراء وسط الجبال مع عشاء بدوي وركوب البيتش باجي، أو رحلات بحرية لمحمية رأس محمد واللي فيها هتقدر تستمتع بالسباحة والغوص في مياه البحر الأحمر وتشوف أجمل المعالم الطبيعية تحت أعماق البحر.

الأكل في شرم الشيخ

أشهر المطاعم في خليج نعمة

مطعم أون دك: وده مناسب جدًا للشباب أو العرسان الجدد لأنه فندق عائم، يعني هتاكل وانت بتستمتع بألذ المأكولات اللي بيقدمهالك، ده غير العروض الفنية اللي بتقام فيه، ومن أشهر الأطباق اللي بيقدمها هي المأكولات البحرية.

مطعم لا فلور: وهو مطعم فرنسي، ومعروف عن الأطباق الفرنسية الكلاسيكية والذوق الرفيع، ومن أشهر الأطباق اللي بيقدمها المطعم هو سمك السالمون المشوي، واللحوم، والمكان المناسب لإقامة الإحتفالات والمناسبات العائلية زي أعياد الميلاد، وهو مفتوح على مدار الإسبوع من الأحد للإثنين في الفترات المسائية.

مطعم كَمِل بار: وهو عبارة عن 3 أقسام، مكان رياضي بيتقدم فيه المشروبات وده مناسب للرياضيين لأنه مُزود بست شاشات عرض بتذيع المباريات الرياضية وسباقات السيارات طول اليوم، وبليل بيبقى مكان للرقص والغناء على الأنغام الموسيقية الجميلة، أما القسم التاني فهو مكان مناسب لتناول المأكولات البسيطة والمشروبات المتنوعة والإستمتاع بمناخ هادي، والقسم التالت هو مكان مناسب لمُحبي الهدوء والرومانسية لإنه باختصار عبارة عن مكان مفتوح في الهواء الطلق وبيتم فيه عزف الموسيقى الهادية.

مطعم فيفا بيتش: وبيتميز المطعم بإطلالته على البحر الأحمر، وهو مكان رومانسي جدًا تقدر فيه تقضي وقت لطيف مع شريك الحياة وانتو بتسمتعوا بألذ الأطباق من المأكولات البحرية الطازة مع المشروبات وسط الموسيقى الهادية ومنظر البحر الخلاب.

مطعم رانجولي: وهو مطعم هندي أصيل لأن الطباخ الموجود فيه من مدينة “مومباي” الهندية، عشان كده حب يقدم الأكل الهندي على أصوله، والمطعم مُزين بالديكورات الهندية وكمان العاملين فيه لابسين الأزياء الهندية اللى بيتم فرضها على زوار المكان.

مطعم فيروز: وبيقدم الأطباق الشهيرة من منطقة الشرق الأوسط، وأشهر الأطباق اللي بيطبخها هي كبد الدجاج المطبوخة، ومخبوزات الفاصوليا، وأسعار المطعم معقولة وهتستمتع بالأكلات اللذيذة اللي بيقدموها.

مطعم بومودورو: بيقدم ألذ بيتزا في جنوب سيناء، ده غير المكرونة والمأكولات البحرية، وده لأنه ليه صلصات خاصة بيضيفها على الأطباق اللي بيقدمها، وهو من المطاعم اللي بيحبها الشباب للمأكولات اللذيذة اللي بيقدمها.

مطعم موون لايت: وهو من المطاعم الرومانسية اللي فيها كتير من جو مدينة دهب، خصوصًا انه مُطل على البحر الأحمر، وبيقدم المشويات والمأكولات البحرية، والخدمة فيه ممتازة.

حجز فنادق في خليج نعمة

الفنادق في خليج نعمة

فندق نوفوتيل شرم الشيخ: يُصنف من فنادق الـ 5 نجوم، وبيوفر الخدمات الفندقية والسياحية زي خدمة الإنترنت المجانية، وحمام السباحة، و3 مطاعم بتقدم ألذ الأطباق المحلية والعالمية، ومركز صحي بيوفرلك جلسات المساج اللي بتساعدك في استعادة النشاط، وكمان صالة للياقة البدنية مُجهزة بالأجهزة الرياضية الحديثة، والغرف الموجودة في الفندق مؤثثة على أحدث طراز وبتحتوي كل منها على ميني بار وإطلالة على معالم المدينة الطبيعية، وحمام خاص.

فندق إيدن روك خليج نعمة: ويُصنف من الفنادق الـ 3 نجوم، وبيوفر إطلالات ساحرة على معالم المدينة حيث الجبال والبحر الأحمر، وكمان متوافر فيه الخدمات السياحية اللي بتتمثل في خدمة الإنترنت المجانية، وحمام السباحة، والمطعم اللي بيوفر ألذ المأكولات المحلية والعالمية، مع المشروبات المتوافرة في البار على مدار اليوم، والغرف الموجودة فيه بأثاثات خشبية على طراز راقي، ومتوافر فيها تلفزيون مع قنوات فضائية، وميني بار، وحمام خاص مُجهز بأدوات الإستحمام والنظافة.

فندق كهرمانة: يُصنف من فنادق الـ 3 نجوم، وبيوفر الخدمات السياحية زي خدمة الإنترنت المجانية، وحمام السباحة، ومطعم بيقدم الأطباق الإيطالية والمحلية في الهواء الطلق، وكمان مشروبات متنوعة في البار الموجود على حمام السباحة، ومركز صحي بيقدم خدمة السبا والساونا، والغرف الموجودة فيه بتتميز بإحتوائها على البلكونات الكبيرة مع إطلالة مميزة، وتلفزيون، وميني بار، وحمام خاص مُجهز بأدوات النظافة والإستحمام.

منتجع وسبا ستيلا دي ماري بيتش: من منتجعات الـ 5 نجوم والمناسب للأزواج الجدد لمرافقه السياحية اللي بيوفرها لزواره من الشاطئ الخاص وحمام السباحة، والـ 3 مطاعم اللي بتقدم ألذ الأطباق والمأكولات العالمية وسط الطراز الراقي، وخلال إقامتك في المنتجع هتقدر تستمتع بالأنشطة المائية زي الغطس والسباحة، أما في الفترات المسائية بيتم إقامة الفعاليات والأنشطة السياحية لإسعاد الزوار زي العروض الفنية من الرقص والغناء، والغرف الموجودة فيه بتتميز باحتوائها على الشرفات المطلة على البحر الأحمر، وتلفزيون وميني بار وحمام خاص.

منتجع حياة ريجنسي شرم الشيخ: من منتجعات الـ 5 نجوم، بيتميز بموقع مميز وسط المعالم الطبيعية من الأشجار والنخيل، وبيتوافر فيه حمام السباحة والشاطئ الخاص و5 مطاعم بتقدم الأطباق المحلية والعالمية مع إطلالة على البحر الأحمر أو حمام السباحة، والمنتجع بيتوفر فيه المركز الصحي اللي بيقدم خدمة المساج، وكمان منطقة الألعاب من ملاعب الإسكواش والتنس ومنطقة مُخصصة للأطفال، والغرف الموجودة فيه بتحتوي على حمام خاص مُجهز بمرافق الإستحمام وأدوات النظافة المصنوعة من معادن منطقة “البحر الميت”، ده بالإضافة للتلفزيون وإطلالة ساحرة على البحر الأحمر.

فندق أوناس دايف كلوب: بيصنف من فنادق الـ 2 نجمة، وبيحتوي على شاطئ، ومتوافر فيه مركز للغوص ده غير الرحلات البحرية اللي بيقوم بتنظيمها، وخدمة الإنترنت المجانية، وأماكن لإنتظار السيارات، كمان تقدر تستمتع بالأطباق اللذيذة المتوافرة على مدار اليوم في المطعم الموجود فيه مع المشروبات المتنوعة في البار، والغرف المتوفرة في الفندق بتحتوي كل منها على تكييف وتلفزيون وثلاجة وميني بار.

فندق إكسبيرينس كيروسيز بريميير: يُعتبر من منتجعات الـ 5 نجوم، ويتوافر فيه المطعم الخاص بإعداد الأطباق اللذيذة، ده بالإضافة للشاطئ الخاص المزود بمرافق الغوص والسباحة وحمام السباحة، أما الغرف الموجودة فيه فبتتميز باحتوائها على التكييف والحمام الخاص والشرفة المطلة على الحديقة وحمام السباحة، وتقدر كمان تستمتع بالفعاليات الموجودة في المنتجع في الفترات المسائية من الرقص والغناء.

فندق نعمة بلو:  يُصنف من فنادق الـ 3 نجوم، بيتميز بموقعه في خليج نعمة وقربه من الشاطئ الرملي، الفندق بيوفر المرافق السياحية والفندقية زي خدمة الإنترنت المجانية، وحمام السباحة، والمطعم اللي بيقدم الأطباق المتنوعة اللذيذة، بالإضافة للغرف الفندقية المتواجدة فيه واللي بتتميز بإطلالته على المدينة أو المعالم الطبيعية، ومتوافر في كل واحدة منهم الأثاثات المُريحة وتلفزيون بقنوات متنوعة، وميني بار، ودولاب للملابس، وحمام خاص.