رحلات السفاري في شرم الشيخ

رحلات السفاري يعني رحلة وسط الجبال هتوصلها سواء عن طريق ركوب الجمال أو البيتش باجي أو حتى عربيات الدفع الرباعي، ومفيش أجمل من رحلات السفاري اللي بتتعمل وسط جبال سيناء ويا سلام لو في شرم الشيخ بلد السلام والمدينة السياحية العالمية بالطابع المصري الأصيل، واللي فيها هتتعرف على الطبيعة البدوية، وتاكل ألذ المأكولات السيناوية، وتجرب الشاي على الفحم، وكل ده وانت مستمتع بأجمل العروض الفنية اللي بتتعمل وسط الصحراء زي العروض الموسيقية والرقصات الفلكلورية وكمان عروض الساحر والألعاب النارية والتنورة، والجميل في الرحلات دي انها بتبعدك عن أي تكنولوجيا لأنك بتبقى في الصحراء وبتعيش الطبيعة البدائية البسيطة، وبتبقى فرصة جميلة انك تستجم وتتفرج على النجوم وهي منورة في السما بليل مع ضوء القمر الساحر، ورحلات السفاري في شرم الشيخ بتعتبر مناسبة للعائلات والأزواج الجُدد وده لتنوع العروض والأنشطة اللي بتتقدم فيها، وكمان هتقدر تشكِل الرحلة على حسب احتياجك وحسب حالتك الإجتماعية إذا كنت عايزها مناسبة أكتر للعائلات ولا عايز فيها نوع من الرومانسية لو كنت رايح رحلة شهر عسل.

عادًة في رحلات السفاري انت مبتحتاجش حاجة لأن المكان متوافر بيه كل حاجة هتحتاجها وتقدر تشتريها من هناك، لكن زيادة في الإحتياط هتحتاج لإزازة مياه لأن دي لا غنى عنها في الصحرا، وكمان نضارة شمس أو حتى قناع تغطي بيه وشك وانت سايق البيتش باجي لأنك هتبقى في وسط صحرا والرملة كثيفة، وكمان كاميرا عشان تاخد أجمل صور تذكارية وانت هناك، وشنطة ضهر عشان تحط فيها كل ده.

رحلات سياحية إلى شرم الشيخ

زي ما قلنا انك تقدر تتحكم في طبيعة رحلة السفاري وأقسامها حسب رغبتك عشان كده في كزا نوع من رحلات السفاري زي:

رحلة سفاري بالموتوسيكل مع ركوب الجمل وعشاء بدوي: ودي مناسبة للشباب أكتر من العائلات لأنها بتبقى بالموتوسيكل، والرحلة مدتها حوالي 5 ساعات، وبتبقى عبارة عن الإنتقال من الفندق إلى مكان ركوب الموتوسيكل اللي هتركبه لمدة 30 دقيقة لحد الصحرا، ومن هنا هتبدأ العروض الفنية زي الرقصات الفلكورية والشعبية وعروض التنورة والألعاب النارية والساحر، وكمان العشاء البدوي اللذيذ المُكون من المشويات، وهتحبس بعد كده بشاي على الفحم مفيش ألذ منه، بعد كده هترجع بالموتوسيكل على المكان اللي ركبت منه وبعدين بتوصل للفندق بالأتوبيس.

رحلة سفاري بالسيارة مع ركوب الجمل وعشاء بدوي: وهي من الرحلات المناسبة للشباب أو العائلات، لأنها عبارة عن عربية بتتسع لشخصين وبتبقى حوالي 5 ساعات بردو، بنبدأ رحلتنا من الأتوبيس اللي هياخدك من الفندق لحد مكان انتظار العربيات اللي هتركبها لمدة ساعة ونص، وبعدها نص ساعة ركوب جمل، وهنوصل للصحراء عشان ناكل ألذ عشاء بدوي مع الشاي على الفحم، وهنتفرج على العروض اللي هتتقدم فيه زي الرقصات الفلكلورية والشرقية، وكمان عرض التعابين والتنورة، وهنخلص رحلتنا بالعودة مرة تانية لمكان انتظار العربيات وبعد كده على الفندق من خلال الأتوبيس المُكيف.

رحلة سفاري بالموتوسيكل: ودي بردو شبابية أكتر ومناسبة للأزواج الجُدد لأنها من الرحلات الرومانسية اللي طبيعتها هادية، والنوع ده من الرحلات من الأنشطة المُحببة جدًا للسياح المصريين والأجانب، ومواعيد الرحلة بتبقى متاحة مع وقت الشروق أو الغروب وبتبقى حوالي 3 ساعات، بتبدأ من ساعة ما الأتوبيس بياخدك من الفندق لحد مركز الموتوسيكلات اللي هتسوقها لمدة ساعتين لحد ما توصل للخيمة البدوية اللي هتستريح فيها شوية وتشرب الشاي على الفحم، وتتصور مع أجمل المناظر الطبيعية وسط الجبال والتلال، وبعدها هنرجع تاني لمكان انتظار الموتوسيكلات وترجع على الفندق بالأتوبيس المُكيف.

رحلة سفاري بالسيارة: وهي عبارة عن رحلة لمدة 3 ساعات في الصحراء، هتبدأها لما الأتوبيس ياخدك من الفندق لمكان العربيات اللي هتسوقها لمدة ساعتين لحد ما توصل للخيمة البدوية عشان تشرب أحلى شاي بدوي على الفحم، وتقعد تستريح شوية عشان تستمع بمنظر الغروب أو الشروق-حسب الوقت اللي هتحجز فيه- وبعد كده تستعد عشان ترجع تاني لمكان انتظار العربيات وترجع على الفندق بالأتوبيس المُكيف، والرحلة دي مناسبة للشباب أكتر واللي بيحبوا الطبيعة والصحرا لأنها مش مُتاح فيها العروض الفنية اللى هتبقى مناسبة للأطفال والعائلات زي الرحلات التانية.

رحلة سفاري مع عشاء بدوي: ودي من الرحلات المناسبة جدًا للعائلات، لأنك هتبدأ رحلتك فيها من الأتوبيس اللي هياخدك من الفندق لحد الصحرا، هتركب الجمل لمدة 30 دقيقة، وبعد كده ترتاح في الخيم البدوية اللي هينزلك فيها العشاء البدوي اللذيذ مع كوباية الشاي الجميلة وانت بتتفرج على العروض الفنية اللي بتقدم وسط جبال سيناء من الرقصات المتنوعة وعروض الثعابين والألعاب النارية.

رحلة سفاري إلى الكانيون ومنطقة البلوهول: ودي من الرحلات المناسبة جدًا للشباب واللي بيحبوا المغامرات والغطس لأن فيها هنزور أشهر منطقة غوص في العالم وهي منطقة البلوهول، والرحلة هتبدأ من ركوب العربيات الجيب المتجهة إلى وادي “الكانيون” لمدة ساعة ونص تقريبًا، وبمجرد الوصول إلى وادي “الكانيون” هتستمتع بمشاهدة أجمل المناظر الخلابة اللى هتشوفها بامتداد كيلومتر وهتتصور أجمل الصور التذكارية جنبها، وبعد كده هتستريح شوية في الخيمة البدوية وتشرب الشاي البدوي، وهنبدأ رحلتنا من جديد بركوب الجمال متوجهين إلى مدينة “دهب” لمدة 30 دقيقة عشان نستعد للسباحة والغوص في منطقة “البلوهول”، وبعدها هتتغدى وتستعد للعودة مرة تانية للفندق.

احجز أرخص تذكرة طيران في مصر إلى شرم الشيخ

أفضل الأنشطة السياحية في سفاري شرم الشيخ

التمشية وسط المعالم الطبيعية من الجبال والتلال الموجودة في صحراء جنوب سيناء واللي بتتميز بألوانها الخلابة وتضاريسها الفريدة اللي تقدر تتصور جنبها أجمل الصور التذكارية.

ركوب البيتش باجي أو الكار باجي اللي هتمشي بيه وسط الصحراء لمدة ساعة أو أكتر وهتبقى أجمل مغامرة في حياتك ويا سلام لو كانت وقت شروق أو غروب الشمس، يبقى ضربت عصفورين بحجر واحد واستمتعت بأجمل منظر طبيعي وسط جبال سيناء.

كمان تقدر تمزج بين ركوب البيتش باجي مع ركوب الجمال وهتبقى رحلة جميلة جدًا لو مع صحابك أو عيلتك خصوصًا لو معاك أطفال.

ومن الأنشطة الجميلة المناسبة للأعمار المختلفة وسط الصحرا هي التزلج على الرمال والمتوافرة بكثرة.

تقدر كمان تتسلق الجبال مع المرشدين عشان تشوف طبيعة المدينة من أعلى وتستمع بمشاهدة النجوم وضوء القمر.

ولو انت من الناس اللي بتحب المغامرات فتقدر تزور مدينة “سانت كاترين” وتتسلق جبالها وتزور وادي “الكانيون” الشهير بألوانه الخلابة.

مينفعش تزور جنوب سيناء من غير ما تدوق الشاي البدوي الجميل واللي بيعتبر حاجة رسمية في أي رحلة سفاري وبيتميز بطعمه اللذيذ لأنهم بيضيفوا له الأعشاب الجبلية واللي بتتسمى بـ “الحبك”.

ومتوافر كمان مع رحلات السفاري إمكانية حجز عشاء بدوي وعادًة بيكون مشويات وعيش على الفحم وسلطات وطعمه لذيذ جدًا.

وخلال رحلات السفاري هتستمتع بمشاهدة العروض الفنية اللى بتتعمل زي الرقصات الشعبية والشرقية والفلكورية وعروض التنورة والألعاب النارية والساحر وفقرة الثعابين.

بالإضافة لكل ده فأمتع حاجة تقدر تسمتمع بيها فعلًا في الصحرا هي مشاهدة النجوم وفترة غروب أو شروق الشمس.