سوهو سكوير شرم الشيخ

سوهو سكوير بشرم الشيخ واحد من أشهر الأماكن السياحية الموجودة في المدينة، وده لأنه ليه طابع أوروبي على أرض عربية، فهناك هتلاقي التماثيل والمنحوتات الجميلة، والمعالم السياحية زي النافورة الراقصة، وكمان المرافق السياحية والترفيهية من المولات الراقية والبازارات، والمطاعم والكافتريات اللي بتوفر المأكولات المحلية والعالمية اللي هتخليك تلف العالم وانت في مكانك، هتلاقي كمان الألعاب المتنوعة اللي تقدر تمارسها زي البولينج والبلياردو وتدخل جوة أوضة من التلج وتاكل آيس كريم في عز السقعة، وهتشوف الفعاليات والعروض الفنية اللي بتتقدم فيها على مدار الفترات المسائية من اليوم لأنه معروف السفر يعني سهر، عشان كده هتلاقي سوهو سكوير هادي جدًا الصبح لأن كل الفعاليات والأنشطة بتبدأ بليل ولحد الصبح، وبالنسبة للخدمات فإنت هتلاقي فيه كل اللي هتحتاجه لأنه مجمع سياحي وترفيهي مُتكامل، هتقدر توصل للميدان من خلال الأتوبيسات المجانية المتوفرة في خليج نعمة وهضبة أم السيد وخليج النبق، أو حتى من خلال وسيلة الإنتقال اللي بيوفرهالك الفندق، أو من خلال عربيتك الخاصة لأنك هتلاقي أماكن انتظار كتيرة تقدر تركن فيها، ولو نسيت تاخد فلوس معاك متقلقش لأن ماكينات الصرافة متوافرة هناك بالإضافة لمكاتب الصرافة، ولأنك مش هتقدر تقاوم انك تاخد صور تذكارية في سوهو سكوير وتوريها لأصحابك فالمكان متوافر فيه إنترنت مجانًا في كل مكان، وهتبدأ جولتك هناك وهتلاقي المولات والمحلات التجارية والسوبر ماركت، وكمان المكتب الإداري اللي بيساعدك في أي حاجة بتحتاجها وتقدر تتواصل معاهم بلغتك العربية أو حتى الإنجليزي أو الروسي وده عشان يكون في خدمتك دايمًا طول زيارتك.

حجز تذاكر طيران في شرم الشيخ

المعالم السياحية في سوهو سكوير

النافورة الراقصة: وهي أول حاجة هتلفت انتباهك لما تدخل سوهو سكوير بألوانها الجذابة وحركاتها المتجانسة مع المعزوفات الموسيقية، وبتبدأ النافورة عروضها من الساعة 6 ولحد الساعة 3 الفجر، وهي أكبر نافورة راقصة في مصر بتجذب عيون الكبير والصغير عشان يستمتعوا بعروضها الفنية، ده غير عروض الألعاب النارية اللي بتتعمل بالقرب منها عشان تزيد من مكانتها السياحية وتجذب الزوار.

التماثيل والمنحوتات: ودي هتلاقيها طول ما انت ماشي في سوهو سكوير اللي بيمتد لحوالي 5 كيلومتر مربع، ما بين تماثيل الأطفال وتماثيل الفنانين العالميين والحيوانات المتنوعة وأشهر الشخصيات الكرتونية، وكمان المعالم العالمية زي كابينة تليفون لندن والأضواء الجميلة اللي بتتزين بيها خصوصًا في رأس السنة الميلادية واللي هتلاقي فيها شجرة الكريسماس والأضواء الجميلة اللي بتزين الميدان.

المولات والبازارات التجارية: وبيتوافر فيها مجموعة من الهدايا التذكارية الجميلة زي القطع الفرعونية والتماثيل، وكمان الملابس والأحذية والشنط اللي بأرقى الماركات العالمية.

المسرح المكشوف: وفيه بتتقدم مجموعة متنوعة من العروض الفنية لأشهر الفنانين العرب والأجانب، بالإضافة للعروض الترفيهية التانية اللي بيحبها الأطفال من الفرق الفنية المختلفة زي الرقص والغناء.

دور السينما: هتقدر تشوف الأفلام السينمائية اللي نفسك فيها بتقنية الـ 9D واللي بتخليك تحس كأنك جوة الفيلم وبتعيش أحداثة صوت وصورة نتيجة المؤثرات المجسمة المحيطة بيك.

مركز الراكيت: وفيه هتقدر تمارس رياضتك المُفضلة سواء البولينج أو البلياردو، بالإضافة لرياضة الإسكواش والتنس للرياضيين اللي بجد.

المطاعم والكافتريات: وهناك هتقدر تجرب الأكلات العالمية سواء الصينية أو الهندية أو الفرنسية أو الإيطالية وكمان المصرية لأن سوهو سكوير متوافر فيه مجموعة متنوعة من المطاعم اللي بتقدم ألذ المأكولات المحلية والعالمية، بالإضافة للكافتريات اللي تقدر تقعد عليها وتشرب المشروبات المتنوعة أو تاكل آيس كريم عشان تستعيد نشاطك من جديد وتكمل جولتك في الميدان.

الفنادق: ولأن مكان زي ده بتجي له السياح من آخر الدنيا، فكان لازم يوفروا مجموعة مُتكاملة من أماكن الإقامة الراقية اللي يقدروا يسكنوا فيها خلال فترة الرحلة بمدينة شرم الشيخ.

رحلات سياحية إلى شرم الشيخ

الأنشطة السياحية في سوهو سكوير

التسوق: هتقدر تشتري أجمل الهدايا التذكارية والملابس والأحذية والشنط بأرقى الماركات، وكمان هتترسم وتاخد أجمل لوحة فنية من الفنانين الموجودين في الميدان.

التزحلق على الجليد: الميدان فيه ساحة كبيرة متخصصة للتزحلق وهي بتعتبر من أجمل الأنشطة اللي تقدر تمارسها مع صحابك أو عيلتك لأنها مناسبة للأعمار المختلفة من الكبار والأطفال.

اليوجا: وهي من الرياضات المناسبة لمختلف الأعمار وبتساعدك على صفاء الذهن وتجديد نشاطك، وتقدر تسمتع بممارستها في سوهو ستديو، ومتوافر فيه دروس خاصة للسيدات أو دروس مختلطة للسيدات والشباب حسب رغبتك.

السهر: ولأن الحياة في سوهو سكوير بتبدأ متأخر فهو المكان المناسب للسهر، وتقدر تسهر في واحد من النوادي الليلية اللي بتقدم العروض الفنية من الرقص والموسيقى مع المشروبات والحلويات المتنوعة، ومن الأماكن المميزة هو “بانجيا” وبيقدم آيس كريم بالأكسجين وسط مناخ بارد جدًا، يعني هتاكل آيس كريم وانت قاعد على ترابيزة وكرسي مصنوعين من التلج، وهيبقى أجمل مكان تقدر تاخد فيه صور تذكارية.

التصوير: وده الحاجة الوحيدة اللي مش هتبطل تعملها طول ما انت ماشي في سوهر سكوير في شرم الشيخ لأن المكان مليان بالتماثيل البرونزية الجميلة اللي بتمثل أشهر الشخصيات الكرتونية والممثلين العالميين والحيوانات والمعالم الأوروبين زي كابينة تليفون لندن والرموز العالمية المميزة.

الأكل: والمكان مناسب جدًا لقاعدة رومانسية أو حتى شبابية، فإنت تقدر تستمتع بعشاء رومانسي في واحد من المطاعم اللي ليها إطلالة مميزة على الميدان وتجرب الأطباق العالمية زي المأكولات الهندية والصينية وانت مُحاط بمعالم البلد اللي بتاكل أكلها، أو تقدر تجرب عشاء بسيط مع صحابك في المطعم الإيطالي أو المكسيكي أو الصيني أو حتى مطاعم المأكولات البحرية أو اللبنانية وتقضوها ساندوتشات شاورما على السريع، وأشهر المطاعم اللي بينصح بيها هو مطعم الأقصر للمأكولات المصرية، ومطعم “ماي تاي” للمأكولات التايلاندي، ومطعم “بومباي” للمأكولات الهندية، ومطعم “زن” الصيني، ومطعم “تيبانياكي، وسوشي لاونج” اليابانيين.

الأكل في شرم الشيخ

أفضل المطاعم في سوهو سكوير

مطعم بومباي: ومن اسمه فهو من المطاعم اللي بتقدم الأطباق الهندية اللذيذة الشهيرة بالتوابل الكتيرة، ده غير ان المطعم بيقدم لك الأكل مع مناخ هندي عالمي واضح في ملابس الجرسونات وكمان بيقدموا الخدمة على أعلى مستوى وأفضل جودة، وزي ما العاملين في المكان مُلتزمين بالأزياء الهندية الرسمية فإنت كمان مُجبر على ارتدائها عشان تواكب المناخ ودي هتكون تجربة مميزة ليك خصوصًا لو كنت من عشاق الأجواء الهندية.

مطعم ستيك هاوس: وهو من الأماكن المناسبة للأزواج الجُدد لأنك تقدر تحجز بلكونة رومانسية خاصة بيكم وتسمتعوا بألذ عشاء.

مطعم فيوجن: مناسب في أوقات المناخ المعتدل لأنه مفتوح في الهواء الطلق، وبيقدم المأكولات الأوروبية ومأكولات منطقة الشرق الأوسط.

مطعم زين: وهو من أشهر المطاعم الصينية الموجودة في سوهو سكوير.

مطعم أكونا ماتاتا: وهو من المطاعم اللي بتقدم خليط من الأطباق العالمية زي الأكلات المكسيكية والإيطالية والصينية والمصرية وكمان المأكولات البحرية.

مطعم كافيتشينو: من المطاعم اللبنانية اللي تقدر من خلاله تجرب ألذ شاورما لبناني وكفتة، ده غير مجموعة تانية من الأكلات الشرقية اللي بيوفرها لزواره.

آيس كريم موفنبيك: من أشهر الأماكن اللي بتعمل آيس كريم في شرم الشيخ، وتقدر تروح له من الساعة 5 بليل ولحد 1 الصبح.

بانجيا بار: وهو من البارات الغير تقليدية، لأن فيه هتسمتمع بالمشروبات المثلجة والآيس كريم اللذيذ وسط معالم مصنوعة من الثلج، يعني هتلبس البالطو وتستعد لمناخ بتوصل فيه درجة الحرارة لتحت الصفر لأنك هتدخل تلاقي الكراسي والترابيزات مصنوعة من التلج.

حجز فنادق في شرم الشيخ

الفنادق القريبة من سوهو سكوير

منتجع سافوي شرم الشيخ: من منتجعات الـ 5 نجوم وبيتميز بموقعه في ميدان سوهو سكوير بشرم الشيخ، وبيتوافر فيه غرف الإقامة الراقية اللي بتتميز بالتصميمات الراقية والأثاثات العصرية، وكل غرفة مُجهزة بتلفزيون مع قنوات فضائية، وحمام خاص، بالإضافة لمرافق الإقامة المُتكاملة اللي بيحتاج لها الزوار، وموجود بالفندق 6 مطاعم بتقدم المأكولات العالمية والمحلية والمأكولات البحرية، بالإضافة إلى 5 بارات بتقدم المشروبات المتنوعة، أما المرافق السياحية المتوفرة في الفندق فهي بتتمثل في حمامات السباحة والشاطئ الخاص والمركز الصحي اللي بيقدم لك خدمة السبا والساونا، وكمان تقدر تطلب خدمة الإنتقال من وإلى المطار.

فندق وفيلات رويال سافوي: من فنادق الـ 5 نجوم، وبيتميز بموقعه في ساحة سوهو سكوير بشرم الشيخ، بيتوافر فيه الغرف والفيلات الراقية بكافة الخدمات الفندقية، وأماكن الإقامة بتحتوي على تلفزيون وحمام خاص وإطلالة على الحديقة أو البحر الأحمر، وحمام سباحة خاص للفيلات، وبيتوافر في الفندق 3 حمامات سباحة ومرافق للغوص والغطس في المركز المُختص، بالإضافة لغرف المساج والسبا والساونا وحمام السباحة الدافي، ومطعم بيقدم الأطباق العالمية والمحلية مع المقبلات والمشروبات المتنوعة على مدار اليوم.

منتجع فور سيزون شرم الشيخ: من منتجعات الـ 5 نجوم، بيحتوي على 4 حمامات سباحة وشاطئ خاص، و5 مطاعم بتقدم أشهى الأكلات العالمية، بالإضافة للمركز الصحي اللى بيوفر لك جلسات المساج وخدمة السبا والساونا اللى بتساعدك على الإسترخاء وتجديد الخلايا، وكمان صالة للألعاب الرياضية للحفاظ على لياقتك البدنية، والغرف الموجودة فيه بتتميز باطلالة مميزة على البحر الأحمر وحديقة الفندق، وبتحتوي على تلفزيون في منطقة الجلوس وميني بار وحمام خاص، والفيلات الموجودة فيه مُزودة بحمام سباحة خاص مع كراسي تشمس.

منتجع سييرا شرم الشيخ: من منتجعات الـ 5 نجوم،بيتميز بموقعه في سوهو سكوير بشرم الشيخ، وبيتوافر فيه المرافق السياحية زي حمامات السباحة والشاطئ الخاص ومركز الأنشطة المائية اللي بيوفرلك كافة الأدوات اللازمة للغوص والسباحة والتزلج على الماء، بالإضافة للمركز الصحي اللي بيوفر خدمة السبا والساونا وجلسات المساج اللي بتساعدك على الإسترخاء، ده غير المطاعم اللي بتقدم الأطباق المكسيكية والمغربية والصينية والمصرية اللذيذة على نظام البوفيه المفتوح، أما الغرف الموجودة فيه فهي بتتميز بإطلالتها على الحديقة أو حمام السباحة ومتوافر في كل منها تلفزيون وميني بار وحمام خاص.

فندق كونكورد السلام شرم الشيخ: من منتجعات الـ 5 نجوم، وبيتميز بموقعه المميز القريب من سوهو سكوير بشرم الشيخ الشهيرة بإقامة الفعاليات والأنشطة السياحية بالإضافة للمولات التجارية الموجودة فيها، والفندق بيتوافر فيه المرافق والخدمات السياحية اللى بتوفر لك رحلة سعيدة، وده من خلال حمامات السباحة والشاطئ الخاص وخدمة الإنترنت المجانية في المناطق العامة، والمطعم اللي بيوفرلك الأطباق العالمية مع اطلالة ساحرة على البحر الأحمر، ده بالإضافة لصالة الألعاب الرياضية والمركز الصحي المتوافر فيه السبا والساونا، والغرف الموجودة فيه بتتميز باطلالتها على حمام السباحة والحديقة، وبيتوافر فيها التلفزيون وحمام خاص ومنطقة جلوس.

منتجع هيلتون شاركس باي: من منتجعات الـ 4 نجوم، موجود على مسافة 5 كيلومتر من مطار شرم الشيخ الدولي، وبيتوافر فيه 7 حمامات سباحة في الهواء الطلق، وصالة ألعاب رياضية مُجهزة بأدث الأدوات الرياضية، وكمان المركز الصحي اللي بيقدم خدمة السبا والساونا وجلسات المساج اللي بتساعدك على الإسترخاء، وتقدر تجرب ألذ المأكولات من الـ 13 مطعم الموجودين فيه، والغرف الموجودة فيه بتتميز بتصميماتها الراقية والأثاثات المُريحة والمرافق المُتكاملة الموجودة فيها من التلفزيون والثلاجة والحمام الخاص.