الرئيسية / مصر / رحلات اليوم الواحد / رحلة اليوم الواحد إلى الإسكندرية

رحلة اليوم الواحد إلى الإسكندرية

أفضل سعر طيران

مدينة الإسكندرية . . عروس البحر الأبيض المتوسط، تعتبر من أجمل المدن المصرية والمشهورة برحلات المصايف ورحلات اليوم الواحد، فيها هتلاقي المزارات والمعالم المناسبة للطبقات البسيطة ولحد أكابر البلد، مفيش اتنين بيختلفوا على جمالها ومناخها سواء في الصيف اللي بيخليك تهرب لها من حر الشمس، أو حتى في الشتاء لما الدنيا فيها بتشتي وتبقى قطعة مصرية بنكهة أوروبية، شواطئ الإسكندرية بتتميز برمالها الناعمة الجميلة، ومياه بحرها الصافية، ده غير مناخها المعتدل على مدار العام، وكمان فيها المزارات السياحية ما بين التاريخية والطبيعية اللي هتقدر تزورها خلال رحلتك ليها، ومن أهم المعالم السياحية الموجودة فيها هي قلعة قايتباي ومكتبة الإسكندرية ومقابر كوم الشقافة وعامود السواري ومسجد المرسي أبو العباس، وغيرهم كتير من المعالم اللى هنقولك عليها بالتفصيل عشان تستمتع برحلتك للإسكندرية، أما عن الفنادق الموجودة فيها فمتشيلش هم خالص، لأنها مليانة بالفنادق المتنوعة المستويات، ده غير الشقق الفندقية الموجودة فيها واللي بتتميز بأسعارها المناسبة للعائلات والطبقات المتوسطة، والمدينة كمان من الأماكن التجارية اللي هتقدر تشتري منها كل اللي محتاجه سواء من الأسواق الشعبية اللي بتعرض المنتجات بنص ثمنها، أو حتى من المولات الراقية الموجودة فيها.

رحلات سياحية إلى الإسكندرية

المعالم السياحية في الإسكندرية

مكتبة الإسكندرية

متحف الأحياء المائية: بيضم مجموعة من الأسماك والكائنات البحرية، بالإضافة للسلاحف والنباتات المائية اللي بتعيش في البحار المصرية، ده بالإضافة للمجسمات اللي بتمثل الكائنات البحرية، والمتحف من الأماكن المناسبة للعائلات والأطفال، وموجود بالقرب من قلعة قايتباي.
مكتبة الإسكندرية:
ودي عايزه لها يوم لوحدها، لأنها أكبر مكتبة في مصر، والرابعة على مستوى العالم، فيها هتلاقي أكتر من 8 مليون كتاب ومجلد في مختلف المجالات والتخصصات، ده بالإضافة للوسائط المتعددة اللى تقدر تطلع عليها، وكمان بيتوافر فيها أماكن لتعليم اللغات ومهارات الكمبيوتر، وبتقام فيها بإستمرار الحفلات والفعاليات، وفي المكتبة مكتبة مُصغرة للمكفوفين، ده غير المتاحف الـ 6 الموجودة فيها زي متحف الآثار اللي بيضم المقتنيات التاريخية بداية من العصر الفرعوني ولحد العصر الإسلامي مرورًا بالعصر الروماني واليوناني والقبطي، ومتحف الفنون واللي من خلاله بيتم عرض مجموعة من اللوحات الغاية في الجمال، ومتحف التراث اللي بيعرض الأزياء والمقتنيات التراثية الجميلة، ومن المعالم المشهورة كمان في المكتبة هي القبة السماوية اللي من خلالها تقدر تشوف أجمل منظر لمدينة الإسكندرية.
حديقة حيوانات إسكندرية:
وهي من المعالم المناسبة للعائلات والأطفال، لأن فيها هتستمتعوا بمشاهدة الحيوانات والزواحف والطيور الموجودة فيها، وكمان متحف التاريخ الطبيعي، والحديقة بتعتبر ثاني أكبر حديقة حيوانات على مستوى الجمهورية، وموجودة بالقرب من حدائق أنطونيادس.

ماذا تفعل في الإسكندرية

المزارات التاريخية في الإسكندرية

قلعة قايتباي الإسكندرية

متحف الإسكندرية القومي: بيضم المتحف أكتر من 1800 قطعة تاريخية لمختلف العصور بداية من سنة 332 قبل الميلاد ولحد العصر الحديث، والمتحف تاريخه بيرجع لكونه أحد القصور الخاصة بتاجر أخشاب قام بتأسيسه على التصميم الإيطالي الراقي، وفي سنة 1954م اشترته السفارة الأمريكية، بعد كده اشتراه المجلس الأعلى للآثار وحوله للمتحف القومي اللي قاموا بإفتتاحه للجمهور سنة 2003م، وفي المتحف هتقدر تشوف المعالم الفرعونية، والمقتنيات البطلمية، والقطع الأثرية الرومانية والإسلامية.
المتحف اليوناني الروماني:
وهو واحد من متاحف الإسكندرية واللي بيعرض من خلاله التماثيل والقطع التاريخية اللي بتعود للعصر البطلمي والروماني والقبطي، بالإضافة للأواني الفخارية والتيجان الرخامية، والمصنوعات الذهبية من الإكسسوارات الفريدة.
المسرح الروماني:
وهو من المعالم الرومانية وبيرجع تاريخ تأسيسه للقرن الرابع الميلادي، وبيتميز بهندسته المعمارية الواضحة على معالمه، والمسرح مُكون من 13 صف من المدرجات، وبيتسع لحوالي 600 زائر، ده بالإضافة لتوافر أماكن تجارية لبيع المأكولات والمشروبات البسيطة اللي تقدر تشتريها خلال جولتك فيه.
قصر المنتزه:
وهو من أهم المعالم السياحية الموجودة في الإسكندرية، وفيه هتقدر تستمتع بوقت لطيف وسط الحدائق والمعالم الخلابة في الهواء الطلق، بالإضافة لبرج الساعة الموجود فيه واللي اشتهر بالتماثيل الأربعة اللي كانت بتخرج منه وقت تمام الساعة، وكمان كشك الشاي اللى تم تأسيسه على الطراز الروماني واللي بيتميز بإطلالته على البحر الأبيض المتوسط، وكمان سينما الأميرات ودي عبارة عن حديقة مسورة ومُجهزة لعرض الأفلام العالمية لتسلية الأميرات، وفي كمان قصرين هما الحرملك والسلاملك ودول كانوا مختصين لإقامة نساء الملك وحاشيته وكمان رجال الحاشية التابعين للملك.
متحف المجوهرات الملكية:
في المتحف هتقدر تشوف أجمل أنواع وتصميمات المجوهرات الملكية، والقصر تم تأسيسه سنة 1919م في منطقة زيزينيا على الطراز الأوروبي، وبيتكون من 10 قاعات، بيضم كل منها مجموعة من التحف والمجوهرات الملكية الخاصة بعائلة “محمد على باشا”، ده بالإضافة للأدوات المنزلية الملكية المصنوعة من البلاتين والذهب والفضة، والمتعلقات الشخصية المرصعة بالماس والذهب، وكمان النياشين والأوسمة  الخاصة بالخديوي “سعيد باشا”، وغيرهم من المقتنيات الفريدة الخاصة بالأسر الملكية.
حدائق وقصر أنطونيادس:
يُعتبر من أجمل معالم الإسكندرية، وده لأنه من القصور البطلمية المُحيطة بالحدائق اللي بتزينها التماثيل التاريخية لأشهر الشخصيات الأسطورية والتاريخية مثل آلهة الجمال عند البطالمة، ده غير ان الحدائق دي موجود فيها أنواع نادرة من النباتات والأشجار بتتميز بجمالها الخلاب.
قلعة قايتباي:
تُعتبر رمز لمدينة الإسكندرية، وبتتميز بموقعها المُطل على البحر الأبيض مباشرة، وبتضم من الداخل المعالم التاريخية اللي كانت الجيوش المصرية بتستخدمها للتخلص من أعدائها، والمدافع والآلات الحربية، ده غير ان القلعة من الأماكن المميزة اللى تقدر من خلالها تستمتع بإستنشاق الهوا العليل وتستمتع بمشاهدة المدينة من نقطة مرتفعة.

المشتروات في الإسكندرية

أماكن التسوق في الإسكندرية

سان ستيفانو الإسكندرية

سيتي سنتر مول: بيضم حوالي 170 متجر لعرض المنتجات والملابس والأدوات المنزلية، بالإضافة للمطاعم المتنوعة، ودور السينما اللي بتعرض الأفلام في القاعات السبعة الموجودة فيها، وكمان منطقة ألعاب ترفيهية مناسبة للكبار والأطفال.
زنقة الستات:
وهي من الأماكن الشعبية التجارية في الإسكندرية، وفيها هتلاقي الأزياء والأقمشة والإكسسوارات والأدوات المنزلية والهدايا بأرخص الأسعار.
سان ستيفانو:
من أشهر المولات الموجودة في الإسكندرية، وبيضم مجموعة من المتاجر لأشهر الماركات العالمية والمحلية، بالإضافة لمنطقة المطاعم اللي بتضم مطاعم المأكولات السريعة اللذيذة.
مول العروبة:
بيضم مجموعة متنوعة من المتاجر والمطاعم، ومتاح للزيارة من الساعة 10 صباحًا، ولحد منتصف الليل على مدار الإسبوع.
جرين بلازا مول:
بيضم المول حوالي 370 متجر لعرض الأزياء الحريمي والرجالي والأطفال، ولعب الأطفال، والأجهزة المنزلية، بالإضافة لتوافر المطاعم والكافتريات اللي بتقدم المأكولات والمشروبات المتنوعة، وكمان دور السينما اللي بتعرض الأفلام السينمائية الحديثة على أعلى مستوى، وهناك كمان هتلاقي منطقة ألعاب مناسبة للأطفال والكبار.
سوق الإبراهيمية: وهو سوق مخصص للمواد الغذائية زي الخضراوات والفاكهة.
سوق العطارين: وهو من الأماكن التجارية المناسبة لمُحبي الأنتيكات والقطع الفنية، لأن فيه هتلاقي المقتنيات التاريخية النادرة.
سوق الخيط: وهو من اسمه متخصص في عرض الأقمشة والمنسوجات والخيوط بمختلف أنواعها.

الأعياد والإحتفالات في الإسكندرية

أشهر مطاعم الإسكندرية

مطاعم اسكندرية

مطعم النادي اليوناني: وهو من أشهر المطاعم، وهو يوناني الأصل، بيتميز بموقعه المُطل على بحر اسكندرية، فيه هتلاقي الماكولات البحرية اللذيذة من أسماك البحر الأبيض المتوسط بس على الطريقة اليونانية، ومن أشهر الأطباق عنده هو السمك مع شرائح الليمون والبطاطس ومعاهم طبق الأرز.
مطعم البحور السبعة:
المطعم مُتخصص في المأكولات البحرية اللي بيقدمها بطريقة خاصة جدًا، بالإضافة للمقبلات والمشروبات المتوافرة عنده.
قرية بلبع للمشويات:
وهو من أشهر الأماكن اللي تقدر تاكل فيها المشويات والمأكولات البحرية في الإسكندرية، بالإضافة للمقبلات والسلطات المتنوعة.
مطعم بيبوز:
بيتميز بإطلالته على البحر الأبيض المتوسط، وبيقدم مجموعة متنوعة من الأطباق الإيطالية والأمريكية، بالإضافة للمقبلات والحلويات والمشروبات اللذيذة.

شاهد أيضاً

أرخص الرحلات النيلية إلى الأقصر وأسوان

مع دخول الشتا لازم تبدأ تهيأ نفسك للرحلات والأماكن السياحية اللي ممكن تروحها وطبعًا طالما …