مهما كنا بـ نحب السوشي البيتزا أو الناتشوز، هـ يفضل الأكل المصري الأصيل هو الأساس والأصل، الموضوع يا جماعة في الجينات و علشان كلنا دايما نفسنا بتروح للأكل المصرى البيتى ، طلعنا على مطعم كازوزة في شارع 9 المعادي، اللي بـيقدم لنا أكل شعبى مصرى لذيذ مع أجواء من التراث المصرى والروح الشعبيه الجميله اللى مش هتلاقيها فى اى مكان تانى.
وأخيرا بعد ما حصلت المعجزة ولاقينا مكان نقعد فيه في القعدة الأوت دور، قابلنا جرسون لطيف قعدنا فى مكان جنب عدد من المراوح اللي هونت علينا حر الجو.
كازوزة بقعدتة التحفه اللى تشبه القهاوي البلدي وديكوراته المصرية الجميله اللى بتفكرك بأيام زمان وترجعك 20 سنه ورا هيخليك متروحش أى مكان تانى غيروا ، هتلاقى هناك رشاشات الملح والفلفل القديمة أوى ، وصور قديمه للفنانين ، من الآخر كل الحاجات الحلوه اللى بترجعك لأيام زمان
هتلاقى هناك المقبلات اللذيذه معموله بشكل رائع مش هتقدر تقاومه أبدا ،البطاطس مثلا مقرمشة و لونها دهبى ، ويا عينى على السمبوسك فيها جبنة تكفي كل أحلامك، هتلاقيها مقرمشة من بره والجبنه سايحه من جوه .
اما بقى الفطير فهو فطير الأحلام ودا بقى الطبق المميز عند كازوزة واللي بيقدموه على لوح خشب بشكل تحفه هيفكرك بالفطير المشلتت بتاع جدتك ،أما الفطيرة بالكريمة والكسترد دا أختراع رائع بيقدمه كازوزه كافيه مع أول قضمة منها هتنسى الدنيا كلها من حلاوتها هتلاقى الفطيرة مليانة على آخرها بالكريمة وجوزالهند
فكرة الديكورات والفوانيس فى كازوزه مبتكرة وهتخليك تحب المكان وتقضى وقت تحفه فى أجواء زمن الفن الجميل ،مطعم تحفه بجد, باكل عنده كل الاكل اللي بحبه من اول الفول و البيض مرورا بفطيرة السكر لحد ما توصل لسندوتشات الكبده و السجق و الحواوشي .
المود هناك جامد اوي و القعده بتبقا حلوه جدا لأنه مفتوح علي الشارع وانا بحب اكتر حاجه كده بكره الاماكن المغلقه واحلى حاجة انه ينفع فسحة جديدة فى رحلات الشباب التحفة
المزيكا والضحك والقعدة الحلوة فى مطعم كازوزه المعادى والبيبسى الجامد هيخلو المود رايق
الاسعار مش غاليه و مفيش min. charge ومنيو كازوزه المعادى متوفر معانا
بلاش تروحوا الخميس من بعد 8 بيبقا زحمه اوي